खोटाङ, ८ असोज । एसियन लाइफ इन्स्योरेन्स कम्पनी लिमिटेड, शाखा कार्यालय खोटाङले मृत्यु दाबीबापतको रु १४ लाख रकम हस्तान्तरण गरेको छ । दिक्तेल रुपाकोट मझुवागढी नगरपालिका–१४, बुइपा खिरिका स्वर्गीय टंकप्रसाद घिमिरेकी श्रीमती कल्पना घिमिरेलाई कम्पनीले मृत्यु दाबीबापतको रकम हस्तान्तरण गरेको हो ।
इन्स्योरेन्स कम्पनीमा बीमित घिमिरेको गत जेठ–२८ गते वैदेशिक रोजगारीका क्रममा साउदी अरबमा मृत्यु भएको शाखा कार्यालय खोटाङका प्रमुख रमेश श्रेष्ठले जानकारी दिनुभएको छ । बीमितको परिवारले आवश्यक प्रक्रिया पूरा गरेपछि इन्स्योरेन्स कम्पनीले घिमिरेकी श्रीमती कल्पनालाई दाबीबापतको रकम हस्तान्तरण गरेको हो ।
इन्स्योरेन्स कम्पनीले बीमितको परिवारलाई आर्थिक राहतस्वरूप उक्त रकम उपलब्ध गराएको शाखा प्रमुख श्रेष्ठले जानकारी दिनुभएको छ । एसियन लाइफ इन्स्योरेन्स कम्पनी लिमिटेड नेपालमा जीवन बीमा सेवा प्रदान गर्दै आएको बीमा कम्पनी हो ।
इन्स्योरेन्स कम्पनीले जीवन बीमा, बचत तथा आर्थिक सुरक्षासँग सम्बन्धित विभिन्न बीमा योजनामार्फत बीमित तथा उनका परिवारलाई आर्थिक सुरक्षा प्रदान गर्दै आएको छ । बीमितको मृत्यु भएमा बीमा सम्झौताअनुसार हकवालालाई मृत्यु दाबीबापतको रकम उपलब्ध गराउने व्यवस्था छ ।
