काठमाडौं । एनसेल लाभकर सम्बन्धमा सर्वोच्च अदालतको फैसलाको पूर्णपाठ सार्वजनिक भएको छ । गत माघ २३ मा सर्वोच्च अदालतको पूर्ण इजलासले एनसेल बिक्रीबापतको लाभकरको लामो समयदेखि रहेको विवाद अन्त्य गरेको थियो।
नागरिक समाजका तर्फबाट द्वारिकानाथ ढुंगेलसमेत ५ जनाले हालेको रिट जारी हुने ठहर गर्दै प्रधानन्यायाधीश चोलेन्द्र शमशेर राणा नेतृत्वको पूर्ण इजलासले सो फैसला सुनाएको थियो। सो इजलासले एनसेलबाट बिक्रीबापतको लाभकर असुल उपर गर्न परमादेश जारी गरेको थियो। परमादेश जारी गरेको करिब दूई महिनापछि मंगलबार फैसलाको पूर्णपाठ सार्वजनिक भएको हो।
सर्वोच्चको पूर्ण इजालसले एनसेल र रिनोल्ड होल्डिंसले दायर गरेको रिट खारेज गर्दै सोही कम्पनीबाट बाँकी लाभकर असुल गर्नुपर्ने फैसला सुनाएको थियो। पूर्वसचिव द्वारिकानाथ ढुंगेलसहित पूर्व निमित्त महालेखापरीक्षक सुकदेव खत्री, डा जगदीशचन्द्र बरालसहित ५ जनाले २०७३ माघ १४ गते रिट निवेदन दर्ता गराएको समाचार नेपाल लाइभले छापेको छ ।
