४ भदौ, खोटाङ । राष्ट्रिय स्वतन्त्र पार्टी(रास्वपा) सभापति रवि लामिछानेले प्रतिनिधिसभाको दुई तिहाइ बहुमत मात्रै संविधान संशोधनका लागि पर्याप्त अंक नभएको बताउनुभएको छ ।
बिहीबार प्रतिनिधिसभाको राज्य व्यवस्था तथा सुशासन समितिमा आफ्नो धारणा राख्नुहुदँै सभापति लामिछानेले रास्वपा सांसदलाई संविधान संशोधनको कुरा यसरी नउठाउन आग्रह गर्नुभएको हो । ‘कतिपय साथीहरूले हामी संविधान संशोधन गर्छौं भन्नुभयो । प्रतिनिधिसभामा दुई तिहाइ पुग्दैमा त्यो संविधान संशोधन गर्न पर्याप्त अंक होइन,’ लामिछानेले भन्नुभयो, ‘संविधान संशोधनको लागि प्रतिनिधिसभाको दुई तिहाइले मात्र हुन सक्दैन ।’
यस्ता कुरा बोल्दा विषयवस्तुको संवेदनशीलतामा ध्यान दिनुपर्ने उहाँले बताउनुभएको छ । ‘सरकारलाई सघाउँछौं’ भन्ने कुरामा भने आफूले स्वागत गर्ने बताउनुभएको छ । ‘स्पिरिटका आधारमा ठीक छ । तर, तथ्यमा, कानुन र संविधान सबै कुरालाई याद गर्नुपर्ने हुन्छ’, उहाँले भन्नुभयो ।
अहिले संविधानमा भएको कुरालाई मान्ने र अधिकतम रूपमा जनताको म्यान्डेटलाई पूरा गर्नेमा प्रतिबद्ध हुनुपर्नेमा लामिछानेले जोड दिनुभयो । ‘हामीले अदालत पनि पार्टीको हो, यो पनि पार्टीको हो भनिदिन अलिकति मिल्दैन,’ उहाँले भन्नुभयो, ‘किनभने संविधानमा भएको व्यवस्था अनुसार नै संवैधानिक निकायका व्यक्तिहरू संविधानले नै दिएका तत् तत् दायित्व पूरा गरेर नियुक्त गरेका हुन् ।’
अहिले सांसदहरूले असाध्यै धेरै आरोपित गरेर भनिदिँदा ती संस्थाहरूको र ती संस्थाको नेतृत्व गर्ने व्यक्तिहरूको मानमर्दन हुनजाने उहाँले टिप्पणी गर्नुभएको छ । आफू व्यक्तिको पछाडि नरहेको पनि उहाँले प्रष्ट्याउनुभएको छ । संस्थाको मानमर्दन नहोस् भन्नेमा आफू सतर्क रहेको बताउनुहुँदै त्यसले संस्थाको क्षयीकरण हुने चिन्ता व्यक्त गर्नुभएको छ । ‘संस्थाको क्षयीकरण गर्दैगए त्यसले अन्ततोगत्वा लोकतन्त्रलाई धेरै कमजोर बनाउँछ कि भन्ने मेरो आफ्नो रियलाइजेसन हो, ।’
व्यक्तिका रिसले लोकतन्त्रका आधारशीलाका रूपमा रहेका लोकतान्त्रिक संस्थाहरूलाई मक्काउन र ढाल्न खोजे ती संस्थाहरू कमजोर हुँदैजाने र एउटा कालखण्डमा पुगेर तीनको विश्वासनीयता जिरोमा जाने उहाँले टिप्पणी गर्नुभएको छ । ‘त्यसले अन्ततोगत्वा लोकतन्त्र र प्रणालीलाई धरासायी बनाउने ठाउँमा पुर्याउँछ ।’
आफूले कसैले कसैलाई नटेर्ने, कसैले कसैको विश्वास नगर्ने समाजको परिकल्पना नगरेको पनि सभापति लामिछानेले बताउनुभएको छ ।
‘हामीले गर्ने संशोधनले सके एकदुई वटा इँटा थप्ने, नसके त्यसलाई क्षयीकरण गर्न नदिने गरेर पनि समस्या समाधान गर्ने बाटो पहिल्याउनुपर्छ कि भन्ने मलाई लाग्छ,’ लामिछानेले भन्नुभयो ।’
