खोटाङ, २ असोज । जनता समाजवादी पार्टी (जसपा) नेपालले असोज ३ गतेलाई ‘विरोध दिवस’को रुपमा मनाउने भएको छ ।
जसपा नेपालले असोज ३ गते ‘वर्तमान संविधानको मूलभूत विषयवस्तु तथा संविधान संशोधनको अपरिहार्यता विषयमाथि अन्तरक्रिया, बहस तथा विचार गोष्ठी’ गरी विरोध दिवसको रुपमा मनाउन लागेको पार्टीका नेता पूर्ण बस्नेतले जानकारी दिनुभएको छ ।
संविधानमा नेपालको सार्वभौमसत्ता र राजकीय सत्ता नेपाली जनतामा नीहित रहेको जस्ता महत्वपूर्ण उपलब्धि भएतापनि अन्तरिम संविधानमा सहमति भइसकेको केही महत्वपूर्ण विषयहरुलाई बहुमत र अल्पमतको आधारमा उल्टाइएको तथा संविधानमा अधिकांश राम्रा पक्षहरु समाविष्ट भएतापनि अझै विभेद कायम रहेको जसपा नेपालको ठहर छ ।
संविधानको संशोधन/परिमार्जन अपरिहार्य रहेको भन्दै जसपा नेपालले उक्त दिन विरोध दिवसका रुपमा अन्तरक्रिया तथा विचार गोष्ठीको आयोजना गर्न सम्पूर्ण जिल्ला समितिहरुलाई निर्देशन जारी गरिएको बस्नेतको भनाइ छ ।
