खोटाङ, ४ फागुन । रावाबेँसी गाउँपालिका–४ डुम्रेधारापानीका भोजबहादुर थापामगर ‘लाफा दाइ’ले आर्ट (चित्रकला) व्यवसाय सुरु गर्नुभएको २८ वर्ष पूरा भयो । कलाकार भोजबहादुर आफ्नो नामले भन्दा कामले परिचित हुनुभएको छ । उहाँको आर्ट फर्मको नाम हो ‘लाफा आर्ट’ । उहाँ आफ्नो वास्तविक नाम (भोजबहादुर)ले भन्दा पनि लाफा दाइ भनेर चिनिने गर्नुभएको छ । लाफा भनेको मगर भाषामा साथी हो ।
स्नातकसम्मको अध्ययन पूरा गरेर जिल्ला फर्कनुभएका भोजबहादुरले वि.सं. २०५४ सालमा दिक्तेल बजारमा आर्ट व्यवसाय सुरु गर्नुभएको थियो । आधिकारिक रुपमा ‘लाफा आर्ट’ फर्म दर्ता गरेर व्यवसाय सुरु गर्नुभएका भोजबहादुरको अहिले मासिक कमाइ रु ८० हजारदेखि रु एक लाखसम्म हुने गरेको जनाइएको छ ।
जिल्लाको प्रमुख व्यापारिक केन्द्र दिक्तेल बजारस्थित सल्लेसीटोलका गेहकुमार सैंजूको घरमा एउटा कोठा भाडामा लिएर आर्ट व्यवसाय सुरु गर्नुभएका भोजबहादुरले अहिले त्यसैको कमाइबाट आफ्नै घरसमेत किन्न सफल हुनुभएको छ । केही थान कुची र रङको डब्बा राखेर व्यवसाय सुरु गर्नुभएका भोजबहादुरको अहिले फर्ममा मात्रै रु चार करोड बढी लगानी पुगेको भोजबहादुरले जानकारी दिनुभएको छ ।
डुम्रेधारापानी निवासी पदमबहादुर र शुभद्रमायाँ थापामगरका कान्छो सन्तानका रुपमा वि.सं. २०३४ पुस–१५ गते जन्मनुभएका भोजबहादुरले सामाजिक शास्त्रमा स्नातकसम्मको अध्ययन पूरा गर्नुभएको छ । वि.सं. २०६१ सालमा साकेला गाउँपालिका–२ रतन्छाकी रेनुका राईसँग प्रेम विवाह गर्नुभएका भोजबहादुरको दुई छोरी र एक छोरा छन् ।
सुरुमा ब्यानर तथा भित्ते खेलन गर्नुभएका भोजबहादुरको आर्ट फर्ममा अहिले आर्ट सम्बन्धीका सम्पूर्ण काम, शिलालेख, ताम्रपत्र, टुडी बोर्ड, लाइभ बोर्ड, थ्रिडी बोर्ड, डिजिटल बोर्ड, निओन बोर्ड, टि–सर्ट तथा छापहरु प्रिन्ट लगायत सबै सेवा उपलब्ध छ । बिहानदेखि राति अबेरसम्म सेवाग्राहीको भीड लाग्ने भोजबहादुरको आर्ट फर्ममा उहाँकी श्रीमती रेनुकाले भरपुर सहयोग गर्दै आउनुभएको छ ।
आर्ट व्यवसायबाट नाम र दाम दुवै कमाउनुभएका भोजबहादुरले विभिन्न सङ्घ÷संस्थाबाट सम्मानसमेत प्राप्त गरिसक्नुभएको छ । ललितकला सङ्गम विराटनगर र रोटरी क्लबले वि.सं. २०५८ साल तथा खोटाङ बाङ्मय कला प्रतिष्ठानले वि.सं. २०६० सालमा ताम्रपत्रसहित भोजबहादुरलाई सम्मान गरेको हो ।
सरकारी कार्यालय तथा सार्वजनिकस्थलहरुमा झुण्डिएका बोर्ड तथा ब्यानरहरु सबैमा लाफा आर्ट लेखिएका भेटिन्छन् । आर्टसँगै प्रशिक्षकको भूमिकासमेत निर्वाह गर्दै आउनुभएका भोजबहादुरले कला भर्नुभएका आर्टका सामग्री बाहिरी जिल्लाहरु .धरान, विराटनगर, राजधानी काठमाडौँ लगायतका शहरहरुमा समेत निर्यात हुने गरेको छ ।
आर्ट व्यवसायबाटै छोराछोरीको पठनपाठन तथा घर व्यवहार चलाउनुका साथै बचतसमेत गर्दै आउनुभएका भोजबहादुर दम्पतीका जेठी छोरी सिमा थापामगर भारतको बैङ्लोरमा नर्सिङ गर्दै छन् भने, कान्छी सन्ध्या थापामगर काठमाडौँको रिलायन्स कलेजमा विज्ञान विषय लिएर कक्षा–१२ तथा छोरा सस्टिन थापामगर दिक्तेल ईङ्ग्लिस बोर्डिङ स्कूलमा कक्षा–७ मा अध्ययन गर्दै छन् । धनकुटा बहुमुखी क्याम्पसबाट वि.सं. २०५३ सालमा स्नातक उत्तिर्ण गर्नुभएका भोजबहादुरले एसएलसीसम्मको अध्ययन गाउँकै देउराली माध्यमिक विद्यालय डुम्रेधारापानीमा गर्नुभएको हो ।
सानै उमेरदेखि चित्रकलामा रुचि राख्नुहुने भोजबहादुर बिना प्रशिक्षण आर्ट पेसामा व्यवसायिक बन्नुभएको बताइएको छ । “मेरो पढाइ एकातिर भयो । व्यवसाय अर्कोतिर । तरै पनि यही व्यवसायबाट नाम र दाम दुवै कमाएको छु”, उहाँले भन्नुभयो, “व्यवसाय सफल हुनुमा रेणुको ठूलो हात छ । सेवाग्राहीको चाप भएको समयमा दुईजना (श्रीमान÷श्रीमती) मिलेर सेवा दिइरहेका छौँ । सेवाग्रही पनि सन्तुष्ट हुनुहुन्छ ।”
सेवाग्राहीले जिल्लामा हुने मेला÷महोत्सव तथा आमसभाजस्ता सार्वजनिक कार्यक्रमका लागि आवश्यक ब्यानर, सजावटका सामग्री लगायत सबै भोजबहादुरकै आर्ट फर्म बनाएर लाने गरेका छन् । दिक्तेलस्थित शान्तिटोलमा सञ्चालित लाफा आर्ट फर्मबाट उत्पादित सामग्री आकर्षक र गुणस्तरीय हुने सेवाग्राहीले बताउने गरेका छन् ।
आर्ट व्यवसायमा लामो समयदेखि निरन्तर जमिरनुभएका भोजबहादुरलाई सेवाग्राहीहरुले जिल्लामा निर्माण भएका पार्क (उद्यान) तथा पाटीपौवामा समेत लगेर कला भर्न लगाउने गरेका छन् । भोजबहादुरले गर्नुभएको आर्ट सुन्दर, सफा र दीर्घकालीन हुने उहाँका सेवाग्राहीहरुले बताउँदै आएका छन् ।
भर्खरै साकेला गाउँपालिकाले निर्माण गरेको साकेला पार्कमा भोजबहादुरले नै आर्ट गर्नुभएको छ । पर्यटन प्रवद्र्धन गर्ने उद्देश्यसहित गाउँपालिकाको लगानीमा निर्माण गरिएको साकेला पार्कमा भोजबहादुरले विभिन्न जातजातिको मौलिक पहिचान झल्कने आकर्षक चित्रहरु कोर्नुभएको छ ।
आर्ट व्यवसायसँगै प्रशिक्षको भूमिकासमेत निर्वाह गर्दै आउनुभएका भोजबहादुरका चेलाहरुले जिल्लाका विभिन्न ठाउँमा आ–आफ्नो व्यवसाय सुरु गरेका छन् । आफूले सिकाएका चेलाहरुले आफ्नो ठाउँमा फर्किएर आर्ट व्यवसायलाई व्यवसायिक रुप दिएकामा भोजबहादुर खुशी हुनुहुन्छ ।
दश स्थानीय तह रहेको जिल्लामा भोजबहादुरसँगै किशोर राई र लक्ष्मण राईले आर्ट व्यवसाय गर्दै आउनुभएको छ । किशोरले ‘रानोहँछा आर्ट’ र लक्ष्मणले ‘दुमी आर्ट’दर्ता गरेर व्यवसाय गर्नुभएको हो ।
