खोटाङ, २६ मङ्सिर । राष्ट्रिय परिवर्तन पार्टी खोटाङबाट आगामी फागुन–२१ गते हुने प्रतिनिधिसभा निर्वाचनका लागि मिरेश राईको एकल उम्मेदवारी घोषणा गरेको छ । पार्टीले दिक्तेलमा आयोजना गरेको सभामा हलेसी तुवाचुङ नगरपालिका–५ दुर्छिम निवासी २५ वर्षीय युवक मिरेशले उम्मेदवारी घोषणा गर्नुभएको हो ।
महेन्द्र रत्न क्याम्पस बहुमुखी ताहाचलमा शिक्षा शङ्काय लिएर स्नातक तह तेस्रो वर्षमा अध्ययनरत उम्मेदवार मिरेश जेनजी आन्दोलनमा सहभागी युवक हुनुहुन्छ । प्रतिनिधिसभा चुनावका लागि यसअघि उम्मेदवार भएका जिल्लाका अन्य उम्मेदवारभन्दा मिरेश कम उमेरको भएको राष्ट्रिय परिवर्तन पार्टीले दाबी गरेको छ ।
युवाको माग र पूराना राजनीतिक दलप्रति जनतामा निराशा बढ्दै गएकाले ती निराशा चिर्नका लागि आफूले राष्ट्रिय परिवर्तन पार्टीबाट उम्मेदवारी घोषणा गरेको मिरेशले बताउनुभएको छ । आगामी फागुनमा हुने चुनावका लागि राष्ट्रिय परिवर्तन पार्टीले सात बुँदे चुनावी घोषणापत्रसमेत सार्वजनिक गरेको छ ।
चुनावी घोषणापत्रमा प्रत्यक्ष कार्यकारी राष्ट्रपति प्रणाली, शुन्य भ्रष्टाचार, सुशासन र इमान्दार राजनीति, अबको देश विकासमै, नेपालका युवा नेपालमै, जनताप्रति पूर्ण पारदर्शी सरकार, राष्ट्रिय सार्वभौमिकता र सीमा सुरक्षा तथा नेपाली भेष, न्याय, शिक्षा र स्वास्थ्यको देश भन्ने बुँदा समेटिएको छ । उम्मेदवारी घोषणासभामा सहभागी हुनुअघि दिक्तेल बजारमा चुनाव चिन्ह ‘बाँसुरी’सहितको ¥याली प्रदर्शन गरिएको थियो ।
उम्मेदवारी घोषणा गर्नुअघि राष्ट्रिय परिवर्तन पार्टी खोटाङले २१ वर्षीय युवक तपसेन राईको अध्यक्षतामा २९ सदस्यीय जिल्ला कार्यसमति गठन गरेको थियो । समितिको उपाध्यक्षहरुमा दौमन्ता राई, पवन चौलागाई र युशन राई, सचिवमा रामकुमार राई, सहसचिवमा सुमन मगर र गंगा राई, कोषाध्यक्षमा ऋतु राई र सहकोषाध्यक्ष शम्भू नेपाली रहनुभएको पार्टीले जनाएको छ ।
