खोटाङ, ७ मङ्सिर । आगामी फागुन–२१ गते हुने भनिएको प्रतिनिधिसभा निर्वाचनलाई लक्षित गरेर खुला गरिएको मतदाता नामावली सङ्कलन अभियानका क्रममा खोटाङका तीन हजार ९८५ जनाले आफ्नो नाम फोटोसहितको मतदाता नामावलीमा दर्ता गराएका छन् । जेनजी आन्दोलनपछि गठन भएको सरकारले दिएको निर्देशनअनुसार निर्वाचन आयोगले गत असोज–९ गतेदेखि देशभर सञ्चालन गरेको मतदाता नामावली सङ्कलन तथा अद्यावधिक अभियानका क्रममा खोटाङका एक हजार ९२३ जना महिला तथा दुई हजार ६२ जना पुरुषले आफ्नो नाम मतदाता नामावलीमा दर्ता गराएका हुन् ।
जिल्ला निर्वाचन कार्यालय खोटाङले दिएको जानकारी अनुसार फोटोसहितको मतदाता नामावलीमा आफ्नो नाम दर्ता गराउने नयाँ मतदातामध्ये अधिकांश युवा रहेका छन् । जिल्लामा मतदाता नामावली दर्ता गराउने अधिकांश १६ देखि २५ वर्ष उमेर समूहको रहेको निर्वाचन कार्यालयले जनाएको छ ।
यही मङ्सिर–५ गतेसम्म थपिएका नयाँ मतदातामध्ये कार्यालयमा आएर एक हजार २०३ जना र राष्ट्रिय परिचयपत्रको आधारमा दुई हजार ७८२ जनाले फोटोसहितको मतदाता नामावलीमा आफ्नो नाम दर्ता गराएको जिल्ला निर्वाचन कार्यालय खोटाङका प्रमुख रविन मगरले जानकारी दिनुभएको छ । “गत कातिक–१७ गतेसम्म खोटाङमा एक लाख ४४ हजार ३२९ जना मतदाता कायम भएको थियो । अहिले तीन हजार ९८५ जनाले मतदाता नामावलीमा आफ्ना नाम दर्ता गराएका छन्”, उहाँले भन्नुभयो, “निर्वाचन आयोगले आगामी पुस–१५ गते अन्तिम नामावली प्रकाशन गर्ने कार्यतालिका छ । मतदाता नामावलीमा नाम दर्ता गराएर फागुन–२० गतेभित्र १८ वर्ष पूरा भएका व्यक्तिले मतदान गर्न पाउँछन् । त्यो सङ्ख्या पुस–१५ गतेमात्र यकिन हुन्छ ।”
जिल्लामा यसअघि कायम भएका एक लाख ४४ हजार ४२९ जना मतदातामध्ये ८१० जना मतदाताले अन्तर जिल्ला मतदान केन्द्र कायम गरिदिन माग गर्दै कार्यालयमा निवेदन दिएको जिल्ला निर्वाचन अधिकारी मगरले जानकारी दिनुभएको छ । यस्तै, नयाँ मतदाता नामावली दर्ताका लागि २७० जना मतदाताले बाहिर फाराम भरेपनि बायोमेट्रिक गर्न कार्यालय नआएको जनाइएको छ ।
गत भदौ–२३ र २४ गते भएको जेनजी आन्दोलनपछि जिल्लामा निर्वाचनप्रति युवा पुस्ताले चासो दिएको देखिएको छ । दुई नगरपालिका र आठ गाउँपालिका रहेको जिल्लामा पछिल्लो समय युवा पुस्ता राजनीतिमा समेत सक्रिय बन्न थालेका छन् ।
