खोटाङ, ३० चैत । दिप्रुङ चुइचुम्मा गाउँपालिक–६ छितापोखरीको मैस्याङटारस्थित सुम्निमा–पारुहाङ पार्क (उद्यान)मा निर्माण गरिएको किराती पुर्खाहरु सुम्निमा र पारुहाङको सालिक तोडफोड भएको घटनाप्रति गाउँपालिकाले भत्र्सना गरेको छ । लगत मनसायका साथ गएराति अज्ञात समूहले सुम्निमा र पारुहाङको सालिक तोडफोड गरेकोे भन्दै गाउँपालिका प्रमुख लोकेन्द्र राईले आज (शनिबार) विज्ञप्तिमार्फत भत्र्सना गर्नुभएको हो ।
गाउँपालिकाको मुख्य पर्यटकीयस्थलमध्यको रणनीतिक महत्वको क्षेत्रमा रहेको पार्कमा निर्मित सालिक तोडफोड भएको घटना निन्दनीय र निकृष्ट रहेको गाउँपालिका प्रमुख राईले जारी गर्नुभएको विज्ञप्तिमा उल्लेख छ । अक्षम्य आपराधिक घटनाको गम्भीर अनुसन्धान गरी चाँडोभन्दा चाँडो दोषी पत्ता लगाएर कानून बमोजिम कडाभन्दा कडा सजायको दायरामा ल्याउन सम्बन्धित निकायको ध्यानाकार्षण गराइएको छ ।
किराती पुर्खाहरुको सालिक तोडफोड गर्नेलाई पक्राउ गर्न खोटाङका प्रमुख जिल्ला अधिकारी र प्रहरी प्रमुखलाई जानकारी दिइसकेको समेत गाउँपालिका प्रमुख राईले बताउनुभएको छ । पर्यटकीयस्थल मैस्याङटारमा आगामी वैशाख–१ गते साकेला सिली प्रदर्शनी कार्यक्रम राखिएपछि सालिक तोडफोड भएको हुनसक्ने बताइएको छ ।
पर्यटकीयस्थल मैस्याङटार क्षेत्रलाई केन्द्रित गर्दै जिल्लाकै मुख्य पर्यटकीय क्षेत्रको रुपमा विकास गर्न गाउँपालिका तथा प्रदेश सरकारले बजेटको समेत व्यवस्था गरिरहेको अवस्थामा उक्त घटना भएको विज्ञप्तिमा उल्लेख छ । छितापोखरीको मैस्याङटारमा दुई वर्षअघि कोशी प्रदेश सरकार र गाउँपालिकाको संयुक्त रु ४० लाख लगानीमा सुम्निमा र पारुहाङको सालिक निर्माण गरिएको थियो ।
चारैतिर घना जङ्गलको बीचमा अग्लो डाँडामाथि हरिया चउर रहेको मैस्याङटारको प्रवद्र्धन थालिएसँगै आन्तरिक पर्यटकको रोजाइमा पर्न थालेको थियो । मैस्याङटारमा नयाँ वर्ष, दशैँतिहार, साकेला उँभौली–उँधौली र मङ्सिर लागेपछि आन्तरिक पर्यटकहरु पुग्ने गरेको स्थानीयवासीले बताएका छन् ।
प्राकृतिकरुपमै सुन्दर एवम् पर्यटकीयस्थल रहेको मैस्याङटारमा यसअघि स्थानीय बासिन्दाहरु पिकनिक (वनभोज) जाने गरेका थिए । करिब एक हजार १०० रोपनी क्षेत्रफल जमिन ओगटेको पर्यटकीयस्थल मैस्याङटारमा सुम्निमा र पारुहाङको साहितसँगै घुम्न आउने पर्यटकका लागि विभिन्न ठाउँमा बसेर रमिता हेर्न र आराम गर्न मिल्ने फलामका फलैंचाहरु बनाइसकिएको छ ।
गाउँपालिका र प्रदेश सरकारको लगानीमा पर्यटन प्रवद्र्धनको काम शुरु भएसँगै घुमफिर तथा वरपरका दृश्यावलोकन गर्न बाह्य पर्यटकसमेत मैस्याङटार पुग्ने गरेका छन् । आफन्त तथा इष्टमित्रलाई नयाँ ठाउँ घुमाउन परेपनि दिप्रुङ चुइचुम्मा गाउँपालिकाबासीको पहिलो रोजाइमा मैस्याङटार पर्ने गरेको छ ।
सफा मौषम भएको समयमा मैस्याङटारबाट तराईका विभिन्न फाँट तथा सप्तकोशीस्थित भीमनगरको पुलसमेत देखिने स्थानीय बासिन्दाहरुले बताएका छन् । मैस्याङटार पुग्न कच्ची सडक बनिसकेको छ । सडकबाट उत्तिस र सल्लाको जङ्गल पार गर्दै करिब १० मिनेट पैदल हिँडेपछि मैस्याङटार पुगिन्छ ।
कुनै चाडपर्वको अवसरमा मैस्याङटार पुग्ने स्थानीय बासिन्दाले सडकमा पार्किङ गरेको सवारी साधनले सहरको झल्को दिने गरेको छ । परापूर्वकालमा ‘महिलाले हलो जोत्नु हुँदैन’ भन्ने समयमा मैस्याङ नाम गरेकी तामाङ थरकी महिलाले खुकुरी भिरेर हलो जोतेर खेती गरेकाले सो डाँडाको नाम नै मैस्याङटार रहन पुगेको इतिहास छ ।
मैस्याङ दिहुँबाट आएर सो स्थानमा खेतीपाती गर्दै बसेको स्थानीय गणेश कार्कीले बताउनुभएको छ । मैस्याङटारको चौतर्फी विकास गर्न रु चार करोड ८८ लाखको डिपिआर (विस्तृत परियोजना प्रतिवेदन) निर्माण भएको जनाइएको छ ।
