टेलिकमको फोन जडान शुल्क झनै घट्यो, पोष्टपेड सीमको मुल्य जम्मा ९ सय

काठमाडौं । नेपाल टेलिकमले ल्याण्डलाईन फोन जडानको शुल्क घटाएको छ । बुधबार एक प्रेस विज्ञप्ती जारी गर्दै टेलिकमले १ हजार ६ सय ३५ रुपैयाँमै टेलिफोन जोड्न सकिने जनाएको हो । यसअघि टेलिफोन जोड्न २ हजार २ सय रुपैयाँ लाग्ने गर्दथ्यो । टेलिकमले पोष्टपेड मोबाइलको मुल्य पनि घटाएको छ । टेलिकमले १ हजार ५ सय १० रुपैयाँमा दिएको पोष्टपेड सीमको मुल्य जम्मा ९ सय ४५ रुपैयाँ कायम गरेको हो । टेलिकमले फोनको शुल्क घटाएसँगै टेलिफोन नामसारी शुल्क पनि घटाउको छ । अब टेलिफोन नामसारी गर्दा जम्मा ६ सय ७८ रुपैयाँ मात्रै भुक्तानी गरे पुग्छ । यसअघि नामसारी गर्दा १२ सय ४३ रुपैयाँ शुल्क बुझाउनु पर्दथ्यो । नेपाल टेलिकमले आर्थिक विधेयक, २०७६ मा व्यवस्था भएअनुसारको शुल्क कायम गरिएको जनाएको छ । आर्थिक वर्ष लागु भएसँगै अन्य इन्टरनेट प्रदायक सेवा संस्थाहरुले सेवाको मुल्य बढाउँदा टेलिकमले सबै सेवाहरुको मुल्य घटाएको छ । टेलिकमले विभिन्न अफरको शिर्षकमा शुल्क घटाइरहेको छ ।