खोटाङ, खोटाङको हलेसी तुवाचुङ नगरपालिकाको पहिलो महिला मेयर विमला राईले अशक्तलाई निःशुल्क स्वास्थ्य बिमा गरेर आफ्नो कार्यकालको सुरुवात गर्नु भएको छ । मेयर राई निर्वाचित भए पस्चात आज कार्यभार सम्हाल्दै शारीरिक रुपमा अशक्त, एकल नागरिक र अभिभावक बिहिन बालबालिकाको लागि निःशुल्क स्वास्थ्य बिमा कार्यक्रम सुरु गरेर कार्यकालको सुरुवात गर्नु भएको हो ।
मेयर राईले एकल महिला, एकल पुरुष, विधुवा, विधुर, ‘ख, ग र घ’ बर्गको अपांगता भएका नागरिक तथा अभिभावक विहिन बालबालिकाको निःशुल्क स्वास्य बीमा लगाएतका लोकप्रिय कार्यक्रम जिल्लामै पहिलो पटक ल्याउनु भएको छ । उहाँले हलेसी तुवाचुङ नगरपालिका–३ च्यास्मीटारका (ग) वर्गको अपांगता भएका रमला राई र हलेसी तुवाचुङ नगरपालिका–८ धितुङका बिधुर दर्जीमान परियारलाई निःशुल्क स्वास्थ्य बीमाको कार्ड हस्तान्तरण गर्दै कार्यकालको सुरुवात गर्नु भयो ।
एक पटक स्वास्थ्य बीमा गरेपछि बार्षिक न्यूनतम ३ हजार ५०० रुपैयाँ तिरेर स्वास्थ्य बीमा कार्ड नवीकरण गर्ने व्यवस्था छ । तर शारीरिक रुपमा अशक्त, एकल नागरिक र अभिभावक गुमाएका बालबालिकाको स्वास्थ्य बीमाको नवीकरण नगरपालिकाकोतर्फबाट गर्ने व्यवस्था मिलाइएको नवनिर्वाचित मेयर राईले जानकारी दिनु भयो ।
