सडक अलपत्र पार्ने ठेकेदारको स्काभेटर र ब्याक लोडर नगरपालिकाको नियन्त्रणमा

Halesi Khabar

खोटाङ, २० कातिक । सडक निर्माणको जिम्मा लिएर अलपत्र पार्ने ठेकेदार कम्पनीको स्काभेटर र ब्याक लोडर दिक्तेल रुपाकोट मझुवागढी नगरपालिकाले नियन्त्रणमा लिएको छ । दिक्तेल–खोटाङबजार सडक निर्माणको जिम्मा लिएर काम गर्दा गर्दै अलपत्र छाडेपछि निर्माणस्थलमा राखिएको ढुकुछु–बगाले बि.एन.टी निर्माण कम्पनीको स्काभेटर र ब्याक लोडर नगरपालिकाले नियन्त्रणमा लिएको हो ।

नगरपालिकाले नियन्त्रणमा लिएको स्काभेटर र ब्याकलोडरमा साङ्ली लगाएर चाबी हालिएको छ । नगरपालिकाका प्रवक्ता एवम् वडा नं–५ लफ्याङका वडाअध्यक्ष दिनेश घिमिरे र वडा नं १ का वडाअध्यक्ष नवराज राईले आइतबार स्काभेटर र ब्याकलोडरमा ताला लगाउनुभएको हो ।

दिक्तेलस्थित हस्पिटलचौकदेखि लफ्याङको दुबेचिवासम्मको प्याकेजमा ठेक्का लिएको निर्माण कम्पनीका ठेकेदार काम गर्दा गर्दै छाडेर सम्पर्क बिहिन भएका छन् । निर्माणाधीन सडक अलपत्र पारेर ठेकेदार भागेकाले वार्ता गर्न सहज होस् भन्ने उद्देश्यले निर्माण कम्पनीको स्काभेटर र ब्याक लोडर नियन्त्रण लिइएको घिमिरेले बताउनुभयो ।

वि.सं. २०७९ पुस–२० गतेभित्र सक्ने गरी रु पाँच करोड छ लाख ५५ हजार ५९६ लागतमा वि.सं. २०७८ जेठ–२० गते सम्झौता भएको भएको थियो । तर, कामै नसकी फिल्ड छाडेर गएपछि सडक निर्माण अलपत्र परेकाले स्काभेटर र ब्याक लोडर नियन्त्रण लिइएको प्रवक्ता घिमिरेले बताउनुभयो ।

सडक निर्माण अलपत्र छाडेर गएपछि निर्माण कम्पनीसँग सम्बद्ध व्यक्तिको खोजी गर्न र आवश्यक कारबाहीको प्रक्रिया बढाउन नगरप्रमुख तीर्थराज भट्टराई असोज–२८ गते सङ्घीय सडक सुपरीवेक्षण तथा अनुगमन कार्यालय अन्तरगत सडक डिभिजन कार्यालय हर्कपुरसमेत पुग्नुभएको थियो । त्यसपछि पनि गत कातिक–३ गते सम्बन्धित निर्माण कम्पनी र सडक डिभिजन कार्यालयलाई पत्रचार गरेको थियो ।

दुबेचिवा–साप्सुखोला प्याकेजको काम भने खर्चरै शुरु भएको स्थानीय बासिन्दाले बताएका छन् । रु दुई करोड ९६ लाख ३७ हजार ५८६ लागतमा वि.सं. २०७९ माघ–१५ गतेभित्र सक्ने गरी सगरमाथा सजिव आर एन जेवीले वि.सं. २०७८ चैत–२८ गते सम्झौता गरेको थियो ।

तोकिएको म्याद सकिनुभन्दा दुई महिनाअघिनै सक्ने गरी काम भइरहेको निर्माणमा संलग्न कृष्ण घिमिरेले बताउनुभएको छ । अलपत्र सडक छिटो सम्पन्न गराउन ताकेता गर्ने काम भइरहेको सडक डिभिजन कार्यालय हर्कपुरका प्रमुख इन्जिनियर अरुणदेवलाल कर्णले बताउनुभयो ।

यसबाहेक भुते चिरोप्वइन्ट आयुर्वेद सडक स्तरोन्नति र हाटडाँडा–काफ्लेगाउँ–घुम्तिबर सडक स्तरोन्नति अलपत्र पार्ने लगलगे कन्ट्रक्सन चाबहिल, अल्छेढुङ्गा–नेर्पा–दोर्पा सडक स्तरोन्नति अलपत्र पार्ने उत्सव निर्माण सेवालाई काम गराउनु पर्ने भन्दै सघन शहरी तथा भवन निर्माण अयोजनालाई पत्राचार गरिएको नगरपालिकाले जनाएको छ । मध्यपहाडी लोकमार्गमा पर्ने छेपेखोला पुलको जिम्मा लिने सगरमाथा–सजिव–आर.एन जेभी पङ्खुखोला पुलको साप–सिरुवा जेभी र भालुखोला, मेवाखोला पुलसँग सम्बद्ध के.एम. इन्जिनियर विल्डर्सलाई समेत ताकेता गर्न पत्राचार गरिएको जनाइएको छ ।

प्रदेश १ सरकारको रु १२ करोड ७२ लाख ९२ हजार ४३७ को लागतमा निर्माणाधीन हुर्लुङ–जालपा सडक पनि अलपत्रै छ । चार महिनामा सक्ने गरी वि.सं. २०७८ भदौ–३१ गते रौताहा–सुसन आदित्य जेवी निर्माण कम्पनीले सम्झौता भएको थियो ।

दिक्तेल अल्छेढुङ्गा–नेर्पा–दुम्ली सडक स्तरोन्नति पनि निर्माण पनि अपूरै छ । रु ७७ लाख १६ हजार ४४८ को स्टीमेटमध्ये रु ४५ लाख १३ हजार ९६५ को लागतमा गत असार–१६ गते सक्ने गरी वि.सं. २०७८ फागुन–२६ गते उत्सव निर्माण सेवा प्रालि पाँचथरले सम्झौता गरेको थियो ।

म्याद सकिदा समेत काम भने ४० प्रतिशत मात्र सकिएको छ । लगलगे कन्ट्रक्सनले नै ठेक्का लिएको दिक्तेल हाटडाँडा–काफ्लेगाउँ–सडक पनि अलपत्रै छ ।

रु ८५ लाख नाँै हजार ९४० को योजना स्टीमेटमध्ये रु ४६ लाख २२ हजारको लागतमा वि.सं. २०७८ असारमा सक्ने गरी लगलगे कन्ट्रक्सन चाबहिल काठमाडौँले वि.सं. २०७८ माघ–२० गते सम्झौता गरेको थियो ।

राष्ट्रिय पुनःनिर्माण प्राधिकरणको रु २१ करोड एक लाख ८८ हजारको लागतमा निर्माण थालिएको दिक्तेल–खानीडाँडा–आहाले सडक पनि अपूरै छ । वि.सं. २०७६ चैत–७ गतेसम्म काम सक्ने गरी याक्थुङहाङ–साप–सिरुवा जेभी निर्माण कम्पनीले वि.सं. २०७५ असोज–१ गते सम्झौता गरेको थियो ।

नगरक्षेत्रभित्र सञ्चालित योजनामा ठेक्का लिएर काम नगर्ने निर्माण कम्पनीहरुलाई कारबाहीको दायरामा ल्याउन खबरदारी गर्ने काम भइरहेको नगरप्रमुख भट्टराईले बताउनुभयो । पन्ध वडा रहेको यस नगरपालिकामा ठेकेदार कम्पनीमार्फत निर्माणको काम सम्पन्न गरेर सञ्चालनमा ल्याइएका अधिकांश योजनाहरु गुणस्तरहीन रहेको स्थानीय बासिन्दाले आरोप लगाएका छन् ।

तपाईको प्रतिक्रिया