फोटोसहितको मतदाता नामावली दर्ता गराउन नेताहरुबीच होटबाजी

Halesi Khabar

खोटाङ, २२ पुस । आगामी निर्वाचनलाई मध्यनजर गर्दै खोटाङमा आयोजना गरिएको फोटोसहितको मतदाता नामावली सङ्कलन अभियानका क्रममा पाँच हजार ८४६ नयाँ मतदाता थपिएका छन् । गत मङ्सिर–१७ गतेदेखि २६ गतेसम्म र मङ्सिर–२९ गतेदेखि पुस–९ गतेसम्म जिल्लाका दशवटै स्थानीय तहमा सञ्चालन गरिएको फोटोसहितको मतदाता नामावली सङ्कलन अभियानका क्रममा दुई हजार ९६३ महिला र दुई हजार ८८३ पुरुष मतदाताको नाम दर्ता भएको हो ।

पहिलो चरणमा एक हजार ३०९ पुरुष र एक हजार ४३ जना महिला गरी दुई हजार ३५२ नयाँ मतदाता नामावली दर्ता भएको जिल्ला निर्वाचन कार्यालयका सूचना अधिकारी लोकेन्द्रकुमार राईले जानकारी दिनुभयो । दोस्रो चरणमा महिला एक हजार ९२० जना र पुरुष एक हजार ५७४ गरी ३ हजार ४९४ नयाँ मतदाता थपिएका छन् ।

अभियानका क्रममा अन्य जिल्लाका सात जनाले फोटोसहितको मतदाता नामावली दर्ता गराएका जिल्ला निर्वाचन कार्यालयले जनाएको छ । पहिलो चरणमा चारजना र दोस्रो चरणमा तीनजनाले मतदाता नामावली दर्ता गराएका हुन् ।

पहिलो चरणमा केपिलासगढी गाउँपालिका, रावाबेँसी गाउँपालिका, साकेला गाउँपालिका र जन्तेढुङ्गा गाउँपालिकाको केन्द्रमा पुगेर फोटोसहितको मतदाता नामावली सङ्कलन गरिएको थियो । यस्तै, दोस्रो चरणमा ऐसेलुखर्क गाउँपालिका, हलेसी तुवाचुङ नगरपालिका, दिप्रुङ चुइचुम्मा गाउँपालिका र बराहपोखरी गाउँपालिकामा फोटोसहितको मतदाता नामावली सङ्कलनको गरिएको हो ।

स्थानीय तहको निर्वाचन मिति नजिकिएसँगै जिल्लाका अधिकांश स्थानीय बासिन्दा स्वतःस्फूर्त रुपमा फोटोसहितको मतदाता नामावली सङ्कलनमा जुटेका छन् । जिल्लास्थित राजनीतिक दलका नेता तथा कार्यकर्ता, सरोबारवाला निकाय लगायतले फोटोसहितको मतदाता नामावली दर्ता गराउन आव्हान गरेका छन् ।

फोटोसहितको मतदाता नामावली दर्ता गराउन जिल्लाका कतिपय नेताहरुले स्थानीय बासिन्दालाई गाडी नै रिजर्भ गरेर जिल्ला प्रशासन तथा निर्वाचन कार्यालयमा ल्याउने क्रम जारी छ । नेताहरुले स्थानीय तहको निर्वाचनमा आफ्नो पक्षमा जीत हात पार्न कार्यकर्ता तथा स्थानीय बासिन्दालाई अहिलेदेखि नै संरक्षण गर्न थालेका छन् ।

एउटा पार्टीका नेताले एउटा गाउँको स्थानीय बासिन्दालाई गाडीमा लगेर गएको थाहा पाएपछि अर्का नेताले अर्को गाउँका स्थानीय बासिन्दालाई गाडीमै लगेर मतदाता नामावली दर्ता गराउने होटबाजी नै चलेको छ । नेताहरुको सक्रियताले आगामी निर्वाचनमा मतदाताको सङ्ख्या बढ्ने आँकलन गरिएको छ ।

दुई नगरपालिका र आठ गाउँपालिका रहेको जिल्लामा वि.सं. २०७४ सालको निर्वाचनमा एक लाख १८ हजार ३६ जना मतदाता रहेका थिए । गत जेठसम्मको तथ्याङ्क अनुसार पछिल्लो चार वर्षको अवधिमा बढेर एक लाख ३४ हजार ९६ जना पुगेको र त्यस यताको विवरण आउन बाँकी रहेको जिल्ला निर्वाचन कार्यालयका नायब सुब्बा एवम् सूचना अधिकारी राईले जानकारी दिनुभयो ।

स्थानीय तह निर्वाचन ऐनअनुसार २०७४ मा निर्वाचित स्थानीय तहका जनप्रतिनिधिको पदावधि सकिनुभन्दा दुई महिनाअघि निर्वाचन गरिसक्नुपर्ने हुन्छ । स्थानीय तहका जनप्रतिनिधिको पदावधि आगामी जेठमा सकिँदै छ ।

जिल्लाका कतिपय नेताहरुले निर्वाचन मिति घोषणा नै नभइ उम्मेदवारी घोषणा गर्न थालेका छन् । निर्वाचन मिति नजिकिएसँगै जिल्लाका युवापुस्तामा राजनीतिक चासो बढेको पाइएको छ ।

तपाईको प्रतिक्रिया