त्रिधार्मिकधाम हलेसीमा पद्मसम्भवको प्रतिमा शिलान्यास

Halesi Khabar

खोटाङ, २६ भदौ । त्रिधार्मिकधाम खोटाङको हलेसीमा पद्मसम्भवको प्रतिमा शिलान्यास गरिएको छ । हिन्दु, बौद्ध र किराँत धर्मालम्बीको सङ्गमस्थल हलेसीलाई धार्मिक पर्यटनको रुपमा प्रवद्र्धन गर्न हलेसी तुवाचुङ नगरपालिका र नेपाल बौद्ध महासङ्घको संयुक्त लगानीमा आचार्य गुरु पद्मसम्भवको ६० फिट अग्लो प्रतिमा शिलान्यास गरिएको हो ।

वडा नं.–७ महादेवस्थानमा रहेको मञ्जुश्री गुफा क्षेत्रमा पद्मसम्भवको प्रतिमा स्थापना गर्न नगरप्रमुख इवन राई र नेपाल बौद्ध महासङ्घका अध्यक्ष आचार्य नुर्बु शेर्पाबीच २०७७ माघ १८ गते भएको १९ बुँदे सम्झौता अनुसार वौद्ध लामा जोपा रिन्पोछेले शनिबार पूजाआजा गर्दै शिलान्यास पद्मसम्भवको प्रतिमा शिलान्यास गर्नुभएको हलेसी विकास समितिका कार्यकारी निर्देशक समर भुजेलले जानकारी दिनुभयो । पार्क निर्माण गरेर सोभित्र स्थापना गरिने पद्मसम्भवको प्रतिमा वरपर ध्वजापताकाका लागि छुट्टै क्षेत्र, स्वागतद्धार, ध्यान केन्द्र, शान्ति पदयात्रा, विश्राम गृह, बगैँचा, मञ्जुश्री क्षेत्रमा गुम्बा, सरोवर, पदमार्ग लगायतका संरचना निर्माण गरिने जनाइएको छ ।

हलेसी बृहत्तर गुरुयोजना अनुसार निर्माण गर्न लागिएको पद्मसम्भव पार्कमा रु पाँच करोडभन्दा बढी खर्च हुने विस्तृत परियोजना प्रतिवेदन (डिपिआर) तयार भएको नेपाल बौद्ध महासङ्घले जनाएको छ । पद्मसम्भव पार्कको काम पाँच वर्षभित्र सम्पन्न गर्नेगरी शुरु गरिएको नगरप्रमुख राईले बताउनुभयो ।

पद्मसम्भवको साना तथा ठूलो मुर्ती राखिने पार्क क्षेत्रमा शान्ति पूजा हल, चैत्य निर्माण, वौद्ध धर्म सङ्ग्रहालय तथा पुस्तकालय, माने निर्माण, प्रतिमा निर्माण, वौद्ध स्ववारिक्पा शिक्षण केन्द्र, अनुसन्धान केन्द्र, बगैँचा, ढल, पानी, विजुली व्यवस्थापन, तारबार तथा पर्खाल, अपाङ्गमैत्री शान्ति मार्ग लगायतका संरचना निर्माण गरिने जनाइएको छ । पद्मसम्भवको प्रतिमा स्थापना पश्चात वौद्ध धर्म परम्परा अनुसार साँस्कृतिक, अध्यात्मिक महत्वलाई जीवित राख्न त्यसको रेखदेख, सञ्चालन, संरक्षण, मर्मत सम्भार र पाठपूजाको व्यवस्था बौद्ध महासङ्घले गर्ने सम्झौता छ ।

पार्कमा प्रवेश गर्ने आगन्तुकबाट शुल्क उठाएर आम्दानी बाँध्ने र पार्क क्षेत्रमा घेराबारा, पदमार्ग र मूल प्रवेशद्धार निर्माणको काम प्रथम पक्षले गर्ने जनाइएको छ । त्रिधार्मिकधाम हलेसीमा पद्मसम्भवले वुद्धत्व प्राप्त गरेको किंवदन्ती छ ।

मारतिका गुम्बासमेत रहेको हलेसीमा भारत, चिनको तिब्बत, भुटान लगायत विभिन्न देशका बौद्धमार्गीहरु ध्यान तथा पूजापाठका लागि आउने गरेका छन् । धार्मिकरुपमा मात्र नभइ प्राकृतिक रुपसमेत विश्व प्रसिद्ध त्रिधार्मिकधाम हलेसीमा बौद्धमार्गीसँगै हिन्दु र किराँत धर्मालम्बीको पनि उत्तिकै भीड लाग्ने गरेको छ ।

हलेसीलाई हिन्दुहरुले शिवपावर्ती र किराँत धर्मालम्बीले आफ्नो उद्गमथलोको रुपमा मान्ने गरेका छन् । दर्शनार्थी र पर्यटकको बाह्रै महिना उत्तिकै घुइँचो लाग्ने त्रिधार्मिकधाम हलेसीमा रामनवमी, शिवरात्री, बालाचर्तुदशी, हरिवोधनी एकादशी, हरितालिका तीज, बुद्धजयन्ती, बोलबम लगायतमा ठूलो मेला लाग्ने गरेको छ ।

विश्वप्रसिद्ध हलेसीको चौतर्फी विकासका लागि गुरुयोजना निर्माण गर्न प्रतिनिधिसभा सदस्य एवम् नेपाल कम्युनिष्ट पार्टी (नेकपा)का केन्द्रीय भट्टराईको संयोजकत्वमा समिति गठन गरिएको छ । भट्टराईको नेतृत्वमा बनेको समितिले अहिले विज्ञसँगको सल्लाहमा हलेसीको दीर्घकालीन गुरुयोजना निर्माणको काम गरिरहेको जनाइएको छ ।

स्तरोन्नतिको कामसमेत भइरहेको हलेसीमा किराँत धर्मालम्बीको माङखिम (तीन चुल्हा) निर्माणको काम पनि भइरहेको छ । बसाहागुफामा निर्माणाधीन माङ्खिमको काम तीव्रगतिमा अगाडि बढाइएको हलेसी विकास समितिका अध्यक्ष एवम् पूर्वसांसद टंक राईले जानकारी दिनुभयो ।

तपाईको प्रतिक्रिया