नेर्पा भुलभुले प्रथम च्यालेन्ज फुटवल कपको फाईनलमा खावा र रतन्छा भिड्दै

Halesi Khabar

हलेसी खबर

खोटाङ, २३ पुस । खोटाङमा चलिरहेको नेर्पा भुलभुले प्रथम च्यालेन्ज फुटवल कपको फाईनलमा भोजपुरको खावा र खोटाङको रतन्छा पुगेका छन् । गएको पाँच दिनदेखि जारी अन्तर वडास्तरीय फुटबल प्रतियोगितामा दुवै टिमले सोल्मा र बाक्सिलालाई हराउँदै फाईनलको यात्रा तय गरेका हुन् ।

सवैभन्दा ठूलो पुरस्कार राशी भएको प्रतियोगिता अन्तर्गत शुक्रवार हुने फाईनलमा साकेला गाउँपालिका–२ रतन्छा र टेम्के मयुम गाउँपालिका–५ खावाको उत्कृष्ट भिडन्त हुने भएको छ । नेर्पा स्पोर्टस क्लवको आयोजनामा दिक्तेल रुपाकोट मझुवागढी नगरपालिका–६ नेर्पास्थित संसारीडाँडा खेलमैदानमा विहिवार सञ्चालित खेलमा केपिलासगढी गाउँपालिका–४ बाक्सिलाई ५–१ गोल अन्तरले पराजित गर्दै रतन्छा फाइनलमा पुगेको हो ।

यस्तै, निर्धारित समयमा बरावरी २–२ गोलको स्कोर निकालेका दिक्तेल रुपाकोट मझुवागढी नगरपालिका–२ सोल्मालाई ट्राईव्रेकरमा हराउँदै खावाले फाईनलको यात्रा पक्का ग¥यो । खावाले यस अघिको खेलमा पनि दिक्तेल रुपाकोट मझुवागढी नगरपालिका–११ खार्मीलाई ट्राईव्रेकरमै हराउँदै अघि बढेको थियो ।

जम्मा २३ वडा सहभागी सेभेन ए साईड प्रथम च्यालेनज कपमा बाक्सिला र सोल्माले सेमी फाईनालिष्टमै चित्त बुझाउनु परेको छ । प्रतियोगिताका प्रथम टिमले नगद १ लाख १ हजार १ सय ११ र दोश्रो टिमले ५५ हजार १ सय ११ रुपैयाँका साथमा ट्रफी, मेडल र प्रमाणपत्र पाउने प्रतियोगिताका संयोजक बिरेन गुरुङले जानकारी दिएका छन् । प्रतियोगिताको सेमि फाइनलिस्ट दुई टिमले जनही २० हजार १ सय ११ रुपैयाँ नगद पुरस्कार प्राप्त गर्ने संयोजक गुरुङको भनाई छ ।

प्रतियोगितामा उत्कृष्ट गोल रक्षक, डिफेन्डर, मिड फिल्डर, फरवार्ड, प्रशिक्षकलाई जनही २ हजार १ सयका साथमा ट्रफी र प्रमाणपत्र प्रदान गरिनेछ । हाइस्कोररलाई ३ हजार १ सय तथा सर्वोत्कृष्ट खेलाडीलाई नगद ४ हजार १ सयका साथमा ट्रफी र प्रमाणपत्र प्रदान आयोजक नेर्पा स्पोर्टस क्लवले जनाएको छ ।
प्रतियोगिताको अन्तिम दिन बिविध मनोरन्जनात्मक कार्यक्रमसहित फाईनल खेल सञ्चालन गर्ने आयोजकको तयारी छ ।

तपाईको प्रतिक्रिया