नागरिकको सुरक्षामा उत्कृष्ट काम गर्ने खोटाङका सात प्रहरी पुरस्कृत

Halesi Khabar

खोटाङ, ३० असोज । जिल्ला प्रहरी कार्यालय खोटाङले उत्कृष्ट काम गर्ने सात जना प्रहरीलाई पुरस्कृत गरेको छ । नागरिकको शान्ति सुरक्षा एवम् अपराध नियन्त्रणका क्रममा विभिन्न विद्यामा उत्कृष्ट काम गर्ने सात जना प्रहरीलाई शुक्रबार जिल्ला प्रहरी कार्यालय दिक्तेलमा आयोजित ६५ औँ प्रहरी दिवसको अवसर पुरस्कृत गरेको हो ।

कार्यक्रममा ईलाका प्रहरी कार्यालय हलेसीका प्रमुख प्रहरी निरीक्षक दिनेशप्रसाद खरेल, जिल्ला प्रहरी कार्यालय खोटाङमा कार्यरत प्रहरी नायब निरीक्षक भीमबहादुर बस्नेत, अस्थायी प्रहरी चौकी तालखर्कमा कार्यरत प्रहरी सहायक निरीक्षक देबेन्द्रप्रसाद पौडेल, प्रहरी हवल्दार खेमप्रसाद बास्तोला, प्रहरी जवान अनिल नेपाली, रमेश बस्नेत र विमल कार्कीलाई पुरस्कृत गरिएको प्रहरी नायब उपरीक्षक नारायणप्रसाद चिमरियाले बताउनुभयो । जिल्ला प्रहरी कार्यालय दिक्तेलमा आयोजित कार्यक्रममा उत्कृष्ट हुन सफल प्रहरीलाई जिल्ला सुरक्षा समितिका अध्यक्ष एवम् प्रमुख जिल्ला अधिकारी शालिग्राम शर्मा पौडेलले प्रमाणपत्रसहित नगद पुरस्कार प्रदान गर्नुभएको हो ।

यस्तै, प्रहरी दिवसकै अवसरमा जिल्लाका तीन जना अमर प्रहरीका परिवारलाई पनि सम्मान गरिएको छ । जिल्लाका २८ जना अमर प्रहरी परिवारमध्ये दिक्तेल रुपाकोट मझुवागढी नगरपालिका–२ सोल्माका सरस्वती ठाकुर, सोही ठाउँका कमलादेवी आचार्य र वडा नम्बर–४ खाल्लेका लक्ष्मी श्रेष्ठलाई दोसल्ला ओढाएर सम्मान गरिएको जिल्ला प्रहरी कार्यालय खोटाङका प्रवक्ता प्रहरी निरीक्षक गोविन्द साहले बताउनुभयो ।

अमर प्रहरीका परिवारलाई प्रतिनिधिसभा सदस्य एवम् सत्तारुढ दल नेपाल कम्युनिष्ट पार्टी (नेकपा)का केन्द्रीय सदस्य विशाल भट्टराई र संविधासभा सदस्य एवम् नेकपाका केन्द्रीय सदस्य दुर्गाजयन्ती राईले सम्मान गर्नुभएको थियो । प्रहरीले विभिन्न माध्यमबाट आफ्नो अभियानमा सहयोग गर्ने नेपाल रेडक्रस सोसाइटी जिल्ला शाखा र उद्योग वाणिज्य सङ्घलाई प्रशंसा–पत्र प्रदान गरेको छ ।

यस्तै, प्रहरीलाई निःशुल्क जग्गा प्रदान गरेकामा खोटेहाङ गाउँपालिका–८ सिम्पानीका रवीन्द्र खड्कालाई कदर–पत्रले सम्मान गरिएको छ । निःशुल्क जग्गादाता खड्काको अनुपस्थितिमा प्रतिनिधिसभा सदस्य भट्टराईको हातबाट बहिनी सुष्मा बुढाथोकीलाई कदर–पत्र प्रदान गरिएको प्रहरीले जनाएको छ ।

तपाईको प्रतिक्रिया